Прэзентацыя альманаха "Беларус", 12 лістапада

admin | 22-11-2011
 

  У суботу, 12 лістапада, ў традыцыйным для беларусаў месцы – кавярні "Красны Зтраты", прайшла прэзентацыя штогадовага альманаху эмігранцскай літаратуры “Беларус”. І хоць слухачоў было зусім няшмат, атмасфера вечару была вельмі цёплай і сяброўскай. Альманах прадставілі Макс Шчур і Віталь Воранаў, чые творы таксама можна знайсьці ў апошнім нумары.

 

  На пачатку вечара Макс распавёў пра сам альманах і пра зьмест часопіса, адзначыўшы творы Віталя Зайкі, Алеся Тарановіча, Якуба Лапаткі, Ірыны Варабей і Архіепіскапа Юрыя (Эмігідыюша Рыжага).
 
 У самага Макса гэтым разам у часопісе выйшлі новыя вершы і два апавяданьні - “Экзэкуцыя” і "вяртаньне волі”. Апошняе - гэта плынь сьвядомасьці без знакаў прыпынку, які Макс і зачытаў. Але твор апынуўся не такім лёгкім для ўспрыманьня на слых, бо створаны выключна для самастойнага чытаньня. Вершы загучалі зусім інакш. Адзін зь іх, прысьвечаны праскаму беларусу, спартыўнаму заўзятару і перакладчыку, запомніўся асабліва:
 
Перакладчыку Гэрбэрта
 
Ю.Б
 
Паўзе жыцьцё, бягуць спаборніцтвы,
 дванаццаці падгруп парад
у наступ клінам ператворыцца,
і зноў старонка перагорнецца
наперад, анібы назад.

Ізноў, застаўшыся ў плюс-мінусе,
мы будзем гінуць за мэтал
і верыць, што канёк нас вынесе,
нібы пры князі Гедымінасе,
у бітвы казачны фінал,

дзе бы ў гадронавым каляйдэры,
цягнік урэжацца ў цягнік,
усіх адужаюць аўтсайдэры,
зайздросьнікі памруць ад зайздрасьці,
і прыз дадуць - не ацаніць!

Да мэты рушым паступова мы,
ды ўжо цяпер займае дых,
калі знаёмімся мы з новымі
высокіх курсаў прапановамі замест ранейшых русавых.

Усё залежыць ад жэрабя,
пашчасьціць - будзе "заі...ца"...
Трыюмфу прага людажэрная
разьменіць талент на кішэнныя
й падкажа нумар жарабца.

Жыцьцё - гульня і пры ўзурпатары...
Як той казаў - carpe diem...
І мы адчайыя заўзятары,
зноў на быцьця таталізатары
з самой самімі прайграем.

Потым слова ўзяў Віталь Воранаў, які жыве зараз у Познані. У альманаху надрукаваныя яго апавяданьні-нататкі. Віталь зачытаў некалькі са сваіх твораў. Адзін зь якіх мне запомніўся –“Не”:
***
На парозе стаялі двое з белымі надпісамі на чорных майках. Адзін з іх з ветлівай усьмешкай і з поўным захапленьня голасам промовіў:
- Скажы: НЕ сьмяротнаму пакараньню!
Другі адной рукой працягнуў аркуш на якім стаяла ўжо некалькі подпісаў, а другой асадку, якая мела форму пісталета. Запала нязручная, доўгая цішыня. Першы, каб прагнаць канфузнае маўчаньне адкірхнуў. Другі працягваў трымаць асадку і аркуш у працягнутых руках.
- Не – прагучала нечакана як асуджэньне адмова.
- Не? – амаль машынальна, але з пэўным недаверам сказаў першы.
- Не – паўтарыў адказьнік.
- Не? – здавалася дзеля нейкай фармальнасьці перапытаў другі.
- Не – прагучала ў адказ яшчэ раз.
- Не, дык не – ужо пратакольна сказаў першы і кіўнуў другому.
Другі ўрэшце апусьціў руку ў якой трымаў аркуш, а другой рукой нацэліўшы асадку ў голаў нязгоднага, зграбна адбясьпечыў і спусьціў курок.
***
Але вечар не абмежаваўся толькі чытаньнем літаратурных твораў. Макс Шчур зграў некалькі перакладзеных ім песен. Вельмі прыгожа загучаў па-беларуску пераклад зь гішпанскай песьні аргентынскай сьпявачкі Мерседес Соса. А таксама, думаю ўсім спадабалася ірляндская народная песня "Whisky in the jar", альбо ў Максавым перакладзе "Старкі поўны джбан".
 
 
Напрыканцы вечара прысутныя госьці – Лявон Юрэвіч і Наталья Гардзіенка распавялі пра часопіс "Запісы", укладальнікамі якога яны зьяўляюцца. Дзякуючы гэтаму часопісу можна пазнаёміцца з рознымі рэдкімі архіўнымі матэрыяламі, якія тычацца беларускай эміграцыі. 
 
Вось такі цёплы і цудоўны вечар атрымаўся.
 
*Абяцаны беларускі алькагольны напой таксама прысутнічаў:).
 
Калі хто жадае атрымаць альманах "Беларус" пішыце на [email protected]

 

Няма камэнтароў на "Прэзентацыя альманаха "Беларус", 12 лістапада".

Пакінуць новы камэнтар

Значэньне поля ня будзе паказанае публічна ні ў якім разе.
  • Адрэсы вэс-старонак і е-мэйл адрэсы пераўтворацца ў спасылкі аўтаматычна.
  • Дазволеныя HTML тэгі: <a> <p> <span> <h3> <img> <hr> <br> <br /> <ul> <ol> <li> <table> <tr> <td> <b> <u> <i> <sub> <sup> <blockquote> <pre> <strike> <caption> <em> <strong> <embed> <object>
  • Радкі ды абзацы пераносяцца аўтаматычна.
  • Use to create page breaks.

Больш інфармацыі пра опцыі фарматаваньня

Абарона ад спама
This question is for testing whether you are a human visitor and to prevent automated spam submissions.
-